Қазақстан тарихы – алғашқы дереккөздер негізінде. Kozybayev University-де көрнекті археолог, тарих ғылымдарының докторы, профессор, ҚР Ұлттық ғылым академиясының академигі Жәкен Таймағамбетовтің мазмұнды дәрісі өтті. Жәкен Қожахметұлы – Қазақстан аумағынан палеолит дәуіріне жататын 300-ден астам ескерткішті алғаш ашқан ғалым. Ол әлемнің 12 тілінде жарық көрген 550-ден астам ғылыми еңбектің, оның ішінде 53 монография мен 2 авторлық куәліктің авторы. Ғалым Қошқорған-Шоқтас кешені, Ш. Уәлиханов атындағы тұрақ, Шүлбі және басқа да палеолит ескерткіштерінің мәдени қабаттарына қатысты абсолюттік мерзімдерді анықтаған. Сондай-ақ Германия, Бельгия, Жапония, Ұлыбритания, АҚШ және Ресей ғалымдарымен бірлескен халықаралық археологиялық экспедицияларға жетекшілік етеді. Дәл осы Жәкен Таймағамбетов Қазақстан аумағын алғашқы адамдардың бұдан 1 миллион жыл бұрын мекендегенін ғылыми тұрғыдан негіздеп, әлемдік археология ғылымының дамуына елеулі үлес қосты. Танымал ғалым өзінің мол тәжірибесімен студенттермен бөлісті. «Қазақстан палеолиті – палеоантропологиялық соңғы жаңалықтар аясында» тақырыбындағы дәрісі барысында академик соңғы онжылдықта жүргізілген іргелі зерттеулердің нәтижелерін таныстырып, биылғы жылы табылған олжаларға ерекше тоқталды. Маңғыстаудағы Бозжыра шатқалы мен Шілікті өңіріндегі Үшбұлақ-1 тұрақтарынан алынған деректер Қазақстанның ежелгі мәдениеттерін кейінгі палеолит дәуіріндегі адамзат дамуының жаһандық үдерістерімен байланыстыруға мүмкіндік береді. «Қазір ғылым қарқынды дамып келеді. Биылғы бір ғана далалық маусымның өзінде 6 халықаралық экспедиция өткізілді. Қаншама жаңа ақпарат алдық! Маған Жапония, Қытай, Грекия, АҚШ елдерінен студенттер келеді. Экспедицияларға қатысады, диссертацияларын қорғайды да, елдеріне қайтады. Осында қалып, палеолитті зерттеуге қызығушылық танытып, осы бағытта еңбек ететін жергілікті мамандардың көбірек болғанын қалаймын», – деді Жәкен Таймағамбетов. Ғылымға деген құлшынысымен, таңдаған ісіне адалдығымен және ғылымға деген сүйіспеншілігімен Жәкен Қожахметұлы аудиториядағы жастарға ерекше әсер қалдырды. Студенттер дәріске белсенді қатысып, қазіргі археологиялық зерттеу әдістері, Солтүстік Қазақстан аумағындағы ғылыми ізденістер және халықаралық ғылыми ынтымақтастықтың келешегі туралы сұрақтар қойды. Айта кетейік, Жәкен Таймағамбетов – академик Манаш Қозыбаевтың шәкірті. Кездесу барысында ол өзінің ұлағатты ұстазы туралы естеліктерімен бөлісті. Дәріске М. Қозыбаевтың ұлы, тарих ғылымдарының докторы Ілияс Манашұлы да қатысты. «Манаш Қабашұлы – ғалым, тарихшы ретінде басшылық пен мемлекеттік қызметкерлердің де пікіріне құлақ түргізе білген тұлға. Ол өзекті мәселелерді батыл көтеріп, бүгінде Қазақстанда да, шетелде де еңбек етіп жүрген көптеген шәкірт тәрбиеледі. Сіздердің университеттеріңіз оның есімін абыроймен алып жүр. Бүгін тамаша аудиториялар мен зертханаларды араладым, студенттердің тәртібі де жақсы екен. Жастарға Манаш Қозыбаевтың есіміне лайық болуды, оның ісін жалғастыруды және үнемі жаңа білім ізденісінде болуды тілеймін», – деп студенттерге ақ тілегін арнады Жәкен Таймағамбетов. Кездесу соңында Жәкен Қожахметұлына «Академик Манаш Қозыбаев» медалі табысталып, оған Kozybayev University-дің Құрметті профессоры атағы берілді.

Солтүстік Қазақстан облысында педагогикалық сыныптардың ашылуы – оқушылардың болашақ мамандығын саналы түрде таңдауына ықпал етуге, педагогикалық кәсіпке деген қызығушылығын арттыруға және білім беру саласының болашақ көшбасшыларын даярлауға бағытталған маңызды жоба. Бастама Ғабит Мүсірепов атындағы, Шал ақын және Қызылжар аудандарындағы 5 мектепті қамтиды. Университет пен қалалық білім бөлімі арасындағы ынтымақтастық туралы меморандум аясында Kozybayev University базасында қазақ және орыс тілдерінде білім беретін екі педагогикалық сынып ашылды. Бұл сыныптарда Петропавл қаласының оқушылары білім алады. Бүгін 9–11-сыныптарда оқитын 60-тан астам оқушы университетке экскурсияға келді. Университет музейінде оқушылар 1937 жылдан бастау алатын оқу орнының тарихымен, жетістіктерімен және көрнекті тұлғаларымен танысты. Сондай-ақ оқу-зертханалық корпустың заманауи зертханалары мен оқу аудиторияларын аралады. Кітапханада қатысушыларға педагогикалық сыныптарда білім алу барысында пайдалануға болатын ақпараттық және білім беру ресурстары таныстырылды. Бұдан бөлек, оқушылар дәріс барысында оқу үдерісінің қалай ұйымдастырылатынын және оқытушы мен білім алушылар арасындағы педагогикалық қарым-қатынастың ерекшеліктерін бақылауға мүмкіндік алды. «Педагогикалық сынып» жобасы – тек теориялық білім берумен шектелмей, болашақ мамандықты саналы түрде таңдауға жол ашатын маңызды бастама. Қазіргі уақытта Петропавл қаласы мен облыс аудандарының оқушылары үшін педагогика саласын тереңірек танып-білуге бағытталған практикалық және интерактивті сабақтар белсенді түрде өткізіліп келеді. Бүгінгі іс-шара болашақ талапкерлерге университетпен жақынырақ танысуға, студенттік өмірдің атмосферасын сезінуге және оқытушылармен еркін пікір алмасуға мүмкіндік берді. Сонымен қатар қатысушылар ұстаздық мамандықтың үлкен мүмкіндіктерге жол ашатын, ерекше жауапкершілік пен шынайы ықыласты талап ететін маңызды кәсіп екеніне көз жеткізді.

Бүгін Мемлекет басшысы Қасым-Жомарт Тоқаев Құрылтай отырысында «Жаңа тарихи кезеңдегі Қазақстанның өзекті міндеттері» атты Қазақстан халқына Жолдауын жариялап, инфрақұрылымды жаңғырту, құрылыс саласын дамыту, цифрландыру және реформаларды жүзеге асыру мәселелеріне ерекше назар аударды. Президент реформаларды табысты іске асыру үшін заңдарды өзгертумен ғана шектелмей, қоғамдық сананы да жаңғырту қажет екенін атап өтті. Мемлекет басшысы заңға құрметті нығайтуға, білім мен ғылымды, жасанды интеллектіні дамытуға, сондай-ақ отансүйгіштік рухты қалыптастыруға шақырды. Сонымен қатар барлық реформалардың өзегінде азаматтардың мүддесі, ал мемлекеттік саясаттың негізінде әділдік қағидаты тұруы тиіс екенін баса айтты. Kozybayev University ұжымы еліміздің одан әрі дамуына бағытталған бұл стратегияны зор ықыласпен қабылдады. Президент 2027 жылды «Жалпыұлттық ауқымды құрылыс жылы» деп жариялауды ұсынды. Еліміздің барлық өңірінде жолдар, зауыттар, мектептер, ауруханалар және басқа да инфрақұрылым нысандарын салу, сондай-ақ цифрлық экономиканы дамыту жоспарланып отыр. Жолдауда цифрландыру мәселесіне айрықша мән берілді. Қасым-Жомарт Тоқаев Қазақстанның цифрлық экономиканы қалыптастыруы міндетті екенін атап өтті. Қазіргі уақытта елімізде екі суперкомпьютер жұмыс істеп тұр, үшіншісін іске қосуға дайындық жүргізілуде. Kozybayev University-дің Жасанды интеллект және цифрлық трансформация орталығы бүгінде жаңа буын IT мамандарын даярлап, өзіндік цифрлық шешімдерді әзірлеуде. Олардың қатарында жол-көлік оқиғаларының интерактивті картасы, ауыл шаруашылығы саласындағы талдау мен мониторингке арналған цифрлық платформа және басқа да жасанды интеллектке негізделген стартаптар бар. Сонымен қатар Президент ауыл шаруашылығы өнімдерін қайта өңдеуді дамытуды және мал шаруашылығына заманауи технологияларды енгізуді тапсырды. Бұл бағытта университетімізде өңірдің ауыл шаруашылығы тауарын өндірушілерімен тығыз ынтымақтастықта ғылыми зерттеулер жүргізілуде. Президенттің қорытынды сөзінде еліміздің болашағын біліммен, ғылыммен және инновациялармен тікелей байланыстыруы ерекше мәнге ие: «Қазіргі заманның басты күші – білім мен ғылымда, озық инновацияларда. Жаңа технологиялар мен жасанды интеллектіні терең меңгерген ел ғана дамиды». Бұл – жоғары оқу орындары үшін аса маңызды бағдар. Ол ғылыми-зерттеу әлеуетін арттыру, мамандар даярлау сапасын жақсарту және жаңа технологияларды экономиканың нақты салаларында тиімді қолдану мүмкіндіктерін қатар дамыту қажеттігін көрсетеді.

Kozybayev University, Вайенштефан-Триздорф қолданбалы ғылымдар университеті және CT Agro компаниясы арасындағы серіктестік 2025 жылы басталды. Practical Trainee Triesdorf-Kasachstan жобасы аясында «Өсімдіктер туралы ғылым және технологиялар» білім беру бағдарламасының үш студенті Германиядағы Триздорф кампусында 20 апталық оқудан өтті. Бағдарлама қорытындысы бойынша олардың екеуі CT Agro компаниясына жұмысқа орналасты. Бүгін Practical Trainee Triesdorf-Kasachstan жобасының үйлестірушісі Мағираш Шәрімова «Агрономия», «Өсімдіктер туралы ғылым және технологиялар», «Азық-түлік өнімдерінің технологиясы» және «Мал шаруашылығы өнімдерін өндіру технологиясы» білім беру бағдарламаларының 1-3-курс студенттерімен кездесу өткізді. Кездесу барысында ол «Ауыл шаруашылығындағы агроменеджмент» тақырыбында дәріс оқыды. Студенттер аграрлық бизнесті басқарудың заманауи тәсілдерімен, халықаралық жобаға қатысу мүмкіндіктерімен, Германияда тәжірибеге бағытталған білім алу және CT Agro компаниясында кәсіби тұрғыдан даму жолдарымен танысты. Сонымен қатар білім алушылар бағдарламаның келесі кезеңіне қатысу үшін іріктеуден өтті. Қазақстанда бұл бағыттағы ынтымақтастық тек екі жоғары оқу орнымен, соның ішінде біздің университетпен жүзеге асырылып келеді. Жоба студенттерге ауыл шаруашылығы саласында заманауи теориялық білім мен практикалық тәжірибе жинақтауға, озық агротехнологияларды меңгеруге және аграрлық өндірісті тиімді басқару қағидаттарымен танысуға мүмкіндік береді. Бағдарламаны аяқтаған түлектер CT Agro компаниясына жұмысқа орналасады. Осылайша, жоба кәсіби дамудың толыққанды жолын қалыптастырады: Германия университетінде білім алу - халықаралық тәжірибе жинақтау - өндірістік практикадан өту - кепілді жұмысқа орналасу. Мұндай серіктестік әлемдік деңгейдегі сапалы білім мен еңбек нарығындағы нақты мүмкіндіктерді ұштастыра отырып, бәсекеге қабілетті мамандар даярлауға ықпал етеді.

 Республика күніне орай Kozybayev University білім алушылары арасында 3×3 баскетболдан Спартакиада өтті. Жарысқа факультеттердің, Тіл және әдебиет институтының, сондай-ақ Халықаралық кампустың құрама командалары қатысты. Қатысушылар жоғары спорттық дайындық деңгейін, командалық ауызбіршілікті, шеберлік пен жеңіске деген жігерін көрсетті. Ойындар тартысты әрі қарқынды өтіп, қатысушылар мен жанкүйерлерге жарқын эмоциялар сыйлады.  Командалық есептің қорытындысы: 1-орын - Агротехнологиялық факультет;  2-орын - Халықаралық кампус;  3-орын - Педагогикалық факультет.  Жеке номинациялар: Үздік ойыншы - Агротехнологиялық факультеттің студенті Олжас Кенжегузин.Үздік шабуылшы - Халықаралық кампустың студенті Самғат Қуанбай. Спартакиада салауатты бәсекелестік, өзара құрмет пен спорттық бірлік рухында өтті. Мұндай іс-шараларды ұйымдастыру студент жастар арасында баскетболды кеңінен насихаттауға, спорттық дағдыларды дамытуға, командалық рухты нығайтуға және салауатты өмір салтын қалыптастыруға ықпал етеді.  Жеңімпаздар мен жүлдегерлерді құттықтаймыз!

«Көркем мәтін мен әдеби-тарихи дискурсты зерттеудің қазіргі теориясы мен әдіснамасы» тақырыбында өткен республикалық дөңгелек үстел аясында көрнекті ғалым, әдебиеттанушы, филология ғылымдарының кандидаты, университетіміздің профессоры Жанбай Қадыровтың 60 жылдық мерейтойына арналған салтанатты шара өтті. Жанбай Тұрарұлы – саналы ғұмырын білім мен ғылым саласына арнаған білікті зерттеуші, тәжірибелі ұйымдастырушы әрі ұлағатты ұстаз. М. Қозыбаев атындағы Солтүстік Қазақстан университетінде ол Тіл және әдебиет институтының деканы қызметін атқарып, кейін ширек ғасырға жуық уақыт бойы «Қазақ тілі мен әдебиеті» кафедрасын басқарды. Қазіргі таңда профессор ретінде еңбек етіп, студенттерге дәріс оқып, мол білімі мен тәжірибесін жас ұрпақпен бөлісіп келеді. Ғалымның 35 жылдық педагогикалық қызметі өскелең ұрпаққа сапалы білім беруге және отандық ғылымның дамуына қосқан елеулі үлесімен ерекшеленеді. Оның шәкірттері бүгінде еліміздің түкпір-түкпірінде табысты еңбек етуде. Көпжылдық ғылыми-педагогикалық ізденістерінің нәтижесінде Жанбай Тұрарұлы 50-ге жуық оқу құралын және 500-ге тарта ғылыми-әдістемелік мақала жариялады. Ғалымның кәсіби жетістіктері мен қоғамдық қызметі жоғары бағаланған. Ол «Жоғары оқу орнының үздік оқытушысы» және «Қазақстан Республикасының білім беру ісінің құрметті қызметкері» атақтарының иегері. Сондай-ақ Қазақстан Республикасы Президентінің Алғыс хатымен, «Ана тілін дамытуға қосқан үлесі үшін» төсбелгісімен және Қаныш Сәтбаевтың 125 жылдығына арналған мерейтойлық төсбелгімен марапатталған. Бұл марапаттар ғалымның отандық білім беру жүйесін, әдебиеттану ғылымын дамытуға және қоғамдық өмірге қосқан сүбелі үлесінің айқын дәлелі. Іс-шараға қатысқан қонақтар да Жанбай Қадыровтың жоғары кәсіби біліктілігі мен адами қасиеттерін ерекше атап өтті. Олардың қатарында мерейтой иесінің әріптестері, үзеңгілестері, шәкірттері, облыстық білім басқармасының өкілдері, белгілі қазақстандық ғалымдар – академик Серік Негимов, профессорлар Темірғали Есембеков, Сәбит Жәмбек, Жанар Таласпаева, сондай-ақ журналистер, қоғам қайраткерлері, педагогтер мен студенттер болды. Баяндамашылар мерейтой иесінің ғылыми еңбектеріне, зерттеу бағыттарына және қазақ әдебиетін зерттеу мен дамытуға қосқан үлесіне кеңінен тоқталды. Сонымен қатар қатысушылар әдебиеттану ғылымының өзекті мәселелерін талқылап, көркем мәтінді зерттеудегі заманауи теориялық және әдіснамалық бағыттарға талдау жасады. Іс-шара барысында Жанбай Қадыровтың екі кітабының тұсаукесері өтті. Атап айтқанда, А. Толысбаева және Т. Есембековпен бірлесіп жазылған «Көркем дискурс арналары», сондай-ақ Т. Есембековпен авторлық бірлестікте дайындалған «Әдебиет теориясының арналары» атты оқу құралдары көпшілік назарына ұсынылды. Республикалық дөңгелек үстел ғылыми пікір алмасуға, әдебиеттанудың өзекті мәселелерін жан-жақты талқылауға және ғалымның ғылыми мұрасын кеңінен насихаттауға мүмкіндік берді. Жанбай Тұрарұлын 60 жылдық мерейтойымен шын жүректен құттықтаймыз! Зор денсаулық, ұзақ ғұмыр, отбасына амандық пен бақ-береке тілейміз! Жас ұрпаққа білім мен тәрбие берудегі қажырлы еңбегіңіз, студенттермен бөлісіп жүрген мол біліміңіз бен баға жетпес тәжірибеңіз үшін алғысымызды білдіреміз!

М. Қозыбаев атындағы Солтүстік Қазақстан университетінде «Патриотизм және жастар: болашаққа көзқарас» атты ғылыми-практикалық конференция өтті. Ғалымдар, оқытушылар, қоғамдық ұйымдардың өкілдері мен студенттер патриоттық тәрбие, тарихи жадыны сақтау, ұлттық құндылықтар және жас ұрпақтың азаматтық жауапкершілігі мәселелерін талқылады. Кездесудің негізгі тақырыптарының бірі – жастардың қоғамдық келісімді нығайтудағы және ел болашағына қатысты ортақ көзқарасты қалыптастырудағы рөлі болды. Солтүстік Қазақстан мемлекеттік архивінің директоры, философия ғылымдарының кандидаты Сәуле Маликова «Қазақстан Халық Кеңесі және жастар: қоғамдық келісім мен ел болашағына ортақ жауапкершілік» тақырыбында баяндама жасады. Ол жастардың қоғамдық өмірге қатысуы мен Қазақстанның дамуына деген жауапкершілігіне тоқталды. Ел болашағы туралы әңгіме тарихи мұра тақырыбымен жалғасты. «Қоғамдық келісім» КММ басшысы Кемель Оспанов Жалел Қизатов туралы естеліктер мен эсселер жинағын таныстырды. Ал Ғылыми-сараптамалық топтың мүшесі, заң ғылымдарының кандидаты, «Қазақстан тарихы және құқық» кафедрасының өкілі Гүлбахша Мұсабаева Жалел Қизатовтың Қазақстан тарихындағы орны мен тұлғалық мұрасына тоқталды. Баяндамаларда тарихи мұраны сақтау мен аға буынның тәжірибесін кейінгі ұрпаққа жеткізудің маңызы атап өтілді. Қазіргі жастардың дүниетанымын қалыптастыратын құндылықтар мәселесін университет доценті Людмила Гривенная көтерді. Оның «Тәуелсіз Қазақстанның ұлттық құндылықтары жүйесіндегі жастардың заманауи құндылықтық бағдарлары» атты баяндамасы өзгеріп жатқан қоғам жағдайында ұлттық құндылықтардың мәнін түсінуге арналды. Құндылықтар тақырыбы адамгершілік ұстанымдармен сабақтасты. Қазақ тілі мен әдебиеті кафедрасының аға оқытушысы, филология ғылымдарының кандидаты, қауымдастырылған профессор Ақмарал Саркенқызы «Филология» білім беру бағдарламасының екінші курс студенттері Нұрлан Асыл, Назерке Аяпберген және Ақылгүл Қалиевамен бірге «Primeera: «Толық адам коды» тақырыбын ұсынды. Баяндамада жас тұлғаның қалыптасуындағы адамгершілік қағидаттар, рухани даму және жеке жауапкершілік мәселелері қарастырылды. Патриотизмнің тағы бір қыры – білім мен еңбекті ел игілігіне бағыттау. Бұл туралы «Химия және химиялық технологиялар» кафедрасының сеньор-лекторы, университеттің Жас ғалымдар кеңесі төрағасының орынбасары Дарья Островная баяндады. «Ғылыми идеядан елдің дамуына дейін: ғылым арқылы жастар патриотизмі» атты баяндамасында ол жас ғалымдардың зерттеу бастамалары мен отандық ғылымды дамытуға қосатын үлесінің маңызын атап өтті. Конференция бағдарламасы «Қазақстан Республикасындағы этносаралық қатынастар және қоғамдық келісім саласындағы терминдер сөздігінің» таныстырылымымен аяқталды. Басылымды облыстық Ғылыми-сараптамалық топтың төрайымы, философия ғылымдарының кандидаты Сәуле Сүлейменова таныстырды. Сөздік этносаралық қатынастарды ғылыми тұрғыдан зерделеуге және қоғамдағы өзара түсіністікті нығайтуға бағытталған. Конференция аясында патриотизм тарихи, қоғамдық, адамгершілік және ғылыми тұрғыдан қарастырылды. Талқылау барысында елге деген сүйіспеншілік оның тарихы мен мәдениетін құрметтеумен ғана шектелмейтіні, сонымен қатар жеке жауапкершіліктен, білімге ұмтылудан, қоғамдық өмірге белсенді қатысудан және Қазақстанның болашағы үшін еңбек етуге дайын болудан көрінетіні атап өтілді.

 Kozybayev University-де Республика күніне орай «Қазақстан мемлекеттілігі: тарихи сабақтастық және дамудың заманауи бағдарлары» атты өңірлік ғылыми конференция өтті. Іс-шараға академиялық қауымдастық өкілдері, музейлер мен ғылыми мекемелердің қызметкерлері, оқытушылар және студенттер қатысты. Қатысушылардың осындай құрамы тақырыпты ғылыми және қоғамдық тұрғыдан жан-жақты қарастыруға, пікір алмасуға, сондай-ақ Қазақстанның тарихи тәжірибесі мен даму перспективаларын түсіну үшін маңызды мәселелерді талқылауға мүмкіндік берді. «Бүгін біз тарихи ғылым үшін де, қазіргі қоғам үшін де айрықша маңызы бар тақырыпты талқылап отырмыз. Мемлекеттілік бір сәтте қалыптаспайды. Қазіргі мемлекеттік институттардың негізінде ұзақ тарихи тәжірибе, саяси және құқықтық дәстүрлер, мемлекет пен азаматтардың жауапкершілігі туралы қоғамдық түсініктер, сондай-ақ ел дамуының маңызды кезеңдері туралы тарихи жады жатыр», – деп атап өтті М. Қозыбаев атындағы СҚУ Басқарма мүшесі – интернационалдандыру және халықаралық бағдарламалар жөніндегі проректоры Мансұр Әлімханов. Конференцияға қатысушылар Қазақстан мемлекеттілігінің қалыптасуындағы негізгі кезеңдерді, Мемлекеттік егемендік туралы декларацияның қабылдану тарихын, елдің конституциялық даму жолын және тарихи жадты сақтаудағы музейлердің рөлін талқылады. «Конференция тақырыбының ғылыми маңызы ерекше. Өйткені ол Қазақстанның тарихи жолын кешенді түрде зерттеуді көздейді. Бұл – мемлекеттілік дәстүрлері мен саяси-құқықтық институттардың қалыптасуынан бастап, тәуелсіз Қазақстанның қазіргі даму кезеңіне дейінгі ауқымды қамтитын тақырып», – деп атап өтті М. Қозыбаев атындағы СҚУ Халықаралық кампусының атқарушы директоры Әсет Жанисов. Баяндамалармен М. Қозыбаев атындағы СҚУ-дың «Қазақстан тарихы және құқық» кафедрасының меңгерушісі Гаухар Ильясова, Ш. Уәлиханов атындағы Тарих және этнология институтының Петропавл қаласындағы филиалының директоры Нұрболат Абуов, «Абылай хан резиденциясы» музей кешенінің маманы Бауыржан Жунусов және Солтүстік Қазақстан облыстық музей бірлестігінің маманы Айсұлу Сәрсенова сөз сөйледі. Мемлекеттілік пен патриоттық құндылықтар мәселелеріне қатысты жастардың көзқарасын студент Дениэл Едилов пен магистрант Дариға Смаилова таныстырды. «Мемлекеттік егемендік туралы декларация 1990 жылғы 25 қазанда қабылданды. Бұл кезеңде ұлттық қозғалыстар мен одақтас республикалардың мүдделері күн тәртібіне шықты. Кеңес Одағының құрамында болған Қазақ КСР-і осы Декларация арқылы тәуелсіздікке ұмтылу құқығын, Кеңес Одағының құрамынан шығу мүмкіндігін және сыртқы байланыстарын дербес орнату құқығын жариялады. Декларацияны өзіндік бір манифест деп айтуға болады. Негізінде, ол еліміздің тәуелсіздік алуына жол ашқан тарихи құжаттардың бірі болды», – деді Ш. Уәлиханов атындағы Тарих және этнология институтының Петропавл қаласындағы филиалының директоры Нұрболат Абуов. Секциялық отырыстар барысында қатысушылар Қазақстан мемлекеттілігінің тарихын бастауынан бүгінгі күнге дейін зерттеудің өзекті мәселелерін, тәуелсіз Қазақстанның құқықтық жүйесін қарастырды. Сонымен қатар мемлекет, нарық және институттарға саяси-экономикалық талдау жасалды. Конференция қорытындысы бойынша ғылыми ынтымақтастықты дамыту, жас зерттеушілерді қолдау, сондай-ақ университеттің ғылыми мекемелермен, архивтермен және музей ұйымдарымен өзара байланысын кеңейту жөнінде ұсыныстар қамтылған қарар қабылданды.

2026 жылғы 22 қазанда Манаш Қозыбаев атындағы Солтүстік Қазақстан университетінде «Біз қалыптастырып жатқан сенім» атты ашық диалог өтті. Оған Директорлар кеңесінің мүшелері, университет басшылығы, академиялық қауымдастық, серіктестер және бұқаралық ақпарат құралдарының өкілдері қатысты. Кездесу барысында 2025–2026 оқу жылының қорытындылары, корпоративтік басқарудың ашықтығы және университеттің өңір дамуына қосқан үлесі талқыланды. Кездесу алдында қонақтар университеттің зертханалары мен ғылыми алаңдарын аралап, ғалымдар мен студенттердің әзірлемелерімен танысты. Экскурсия бағдарламасына Tomorrow School, Жасанды интеллект және цифрлық трансформация орталығы, Экохаб, мал шаруашылығы мен өсімдік шаруашылығы саласындағы Қазақстан-Қытай зертханалары, «Агрохиманалитика» және «Су сапасын бағалау» зертханалары кірді. Ұшқышсыз ұшу аппараттарының көрмесі мен университеттің қолданбалы ғылыми жобалары ерекше қызығушылық тудырды. Ашық диалог екінші жыл қатарынан өткізіліп отыр. 2025 жылы Директорлар кеңесі өз жұмысының негізгі қағидаттарын алғаш рет жұртшылыққа таныстырса, биыл қатысушылар атқарылған жұмысты қорытындылап, бақылау, тиімділікті бағалау және тәуекелдерді басқару тетіктері туралы баяндады. Директорлар кеңесінің төрағасы Ғалым Байтук университеттің Солтүстік Қазақстан облысы үшін стратегиялық маңызын атап өтті. Қазіргі уақытта жоғары оқу орнында 8 мыңнан астам студент білім алып, 400-ден астам оқытушы еңбек етеді. Өңір экономикасының білікті мамандармен қамтамасыз етілуі көп жағдайда түлектерді даярлау сапасына байланысты. 2025 жылы Директорлар кеңесі 11 отырыс өткізіп, 120-дан астам шешім қабылдады. Әрбір шешім жан-жақты талданып, ықтимал тәуекелдер тұрғысынан бағаланады. Кеңестің қызметі, қабылдаған шешімдері және жылдық есептері туралы ақпарат университеттің ресми сайтында қолжетімді. Биыл алғаш рет тәуелсіз аудиторлық ұйымның қатысуымен Директорлар кеңесінің өз қызметіне тәуелсіз бағалау жүргізілуде. Тәуелсіз директор, Тағайындаулар және сыйақылар жөніндегі комитеттің төрағасы Анатолий Башмаков университет қызметі туралы қоғамды ашық ақпараттандырудың маңыздылығына тоқталды. Директорлар кеңесінің Аудит жөніндегі комитетінің төрағасы Дидар Смағұлов тәуелсіз бақылау, тәуекелдерді басқару және ресурстарды тиімді пайдалану мәселелеріне ерекше назар аударды. Оның айтуынша, аудиттің міндеті тек заңбұзушылықтарды анықтау ғана емес, проблемалық тұстарды дер кезінде айқындауға да ықпал ету. Сондай-ақ ол университет ғалымдарының әзірлемелері зертхана қабырғасында қалып қоймай, өңір мен елдің нақты мәселелерін шешуге көмектесетінін атап өтті. Іс-шара жаңа оқу-зертханалық корпустың жанында «Таза Қазақстан» аллеясының ашылуымен аяқталды. Бұл бастама Президенттің «Таза Қазақстан» жалпыұлттық бастамасы аясында жүзеге асырылып, Республика күніне орайластырылды. Жобаға «Еуразиялық банк» АҚ демеушілік қолдау көрсетті. «Біз қалыптастырып жатқан сенім» ашық диалогы Kozybayev University-дің басқарудың ашық жүйесін дамытуға, қоғаммен және бизнеспен өзара байланысты нығайтуға, сондай-ақ білім беру және ғылыми қызметін өңір қажеттіліктеріне бағыттауға ұмтылысын тағы бір мәрте көрсетті.

Бүгін Kozybayev University ұжымы еліміздің маңызды мерекелерінің бірі – Республика күнін атап өтті. Бұл мереке ұрпақтар сабақтастығын, тарихи еңбектерге деген құрметті және халқымыздың Тәуелсіздікке жету жолындағы табандылығы мен ерік-жігерін бейнелейді. «Мемлекет басшысының жасампаз саясатының арқасында Қазақстан жаңғыру мен тұрақты даму жолында сенімді қадам басып келеді. Жаңа Халық Конституциясының қабылдануы еліміздің даму басымдықтарын айқындады. Олардың ішінде ғылым мен білімге ерекше орын берілген. Жоғары білім беру моделі ауқымды өзгерістерге ұшырап, технологиялар трансферті белсенді жүзеге асырылуда. Осы мемлекеттік реформалардың барлығы университетіміздің жетістіктерінен де көрініс табуда. Биыл соңғы он жылдағы ең жоғары қабылдау көрсеткішіне қол жеткіздік: студенттеріміздің қатары 3000-нан астам жаспен толықты, ал білім алушылардың жалпы саны 8000-нан асты. Университетімізге оқуға түсетін жастардың географиясы да кеңейіп келеді. Бүгінде академиялық ортамыз әлемнің 24 елінен келген студенттерді біріктіреді. Биыл университетімізге алғаш рет Палестина, Пәкістан, Руанда және Ираннан студенттер қабылданды. Әрбір жетістіктің артында университет командасының қажырлы еңбегі тұр», – деп атап өтті Басқарма төрағасы – ректор Ербол Исакаев. Салтанатты іс-шараға университеттің Директорлар кеңесінің мүшелері, педагогикалық еңбек ардагерлері және жоғары оқу орнының серіктестері қатысты. «Биыл университет сапалық тұрғыдан үлкен серпіліс жасады. Білім алушылар санының осындай деңгейге жетуі, әріптестік байланыстардың кеңеюі және жаңа серіктестердің тартылуы жоғары оқу орнының тарихында бұрыннан бері болмаған жетістіктердің бірі. Бүгінде М. Қозыбаев атындағы Солтүстік Қазақстан университеті өңірдегі көптеген бағыт бойынша көшбасшыға айналып, қала дамуына елеулі үлес қосып отырған ірі мекеме болып табылады. Осы жетістіктері үшін университет ұжымына алғысымды білдіргім келеді», – деп атап өтті Kozybayev University Директорлар кеңесінің төрағасы Ғалым Байтук. Дәстүр бойынша осы айтулы күні отандық ғылым мен академиялық қауымдастықтың дамуына елеулі үлес қосып жүрген қызметкерлер мен оқытушыларға құрмет көрсетілді. ҚР Ғылым және жоғары білім министрлігінің «Жоғары және жоғары оқу орнынан кейінгі білім беру ісінің үздігі» құрмет дипломымен Ғылым және технологиялық даму департаментінің бас ғылыми қызметкері Әсемгүл Темірханова марапатталды. «Ауыл шаруашылығы саласының үздігі» төсбелгісіне Ауыл шаруашылығы факультетінің кафедра меңгерушілері Дмитрий Иль мен Фариза Мұқанова ие болды. «Білім беру ісінің құрметті қызметкері» төсбелгісі «Бастауыш, мектепке дейінгі және арнайы білім беру» кафедрасының меңгерушісі Галина Квасных пен «Герман-роман филологиясы» кафедрасының қауымдастырылған профессоры Ирина Ольковаға табысталды. ҚР Ғылым және жоғары білім министрлігінің «Ғылым үздігі» құрмет дипломымен «Экономика, есеп және қаржы» кафедрасының меңгерушісі Дінмұхаммед Шайкин мен Академиялық қызмет департаментінің директоры Майра Валиева марапатталды. Солтүстік Қазақстан облысы әкімінің Алғыс хатымен Заң бөлімінің басшысы Лариса Кудрицкая мен «Математика және физика» кафедрасының доценті Сергей Сартин марапатталды. Сонымен қатар университеттің бірқатар қызметкері мен оқытушысына ҚР Ғылым және жоғары білім министрлігінің грамоталары мен алғыс хаттары, сондай-ақ университеттің ішкі марапаттары табысталды. Кеш соңында университеттің талантты студенттері жиналған қауымға патриоттық мазмұндағы шығармашылық нөмірлерін ұсынып, мерекелік көңіл күй сыйлады. Республика күні – мемлекетіміздің бостандығы мен бірлігін айшықтайтын маңызды мереке. Осы жарқын мерекеде баршаңызға зор денсаулық, бақ-береке мен тұрақтылық, ал Отанымызға бейбітшілік пен өркендеу тілейміз!