Қозыбаев университеті мен Аризона университеті ынтымақтастықты кеңейтуде

Басты назарда жоғары білім, ғылым және инновациялар саласындағы ынтымақтастықты одан әрі нығайтуға, сондай-ақ Аризона университетімен бірлесіп іске асырылып жатқан білім беру бағдарламаларының алғашқы түлектеріне дипломдарды салтанатты түрде тапсыру рәсіміне аударылды.

Төрт жыл ішінде Kozybayev University мен Аризона университетінің жобасы қазақстандық жоғары оқу орны мен АҚШ-тың жетекші зерттеу университеті арасындағы стратегиялық әріптестіктің ең табысты үлгілерінің біріне айналды. Бүгінде осы жоба аясында 1 249 студент білім алуда, оның ішінде 359 студент алты қос дипломды білім беру бағдарламасы бойынша оқиды. Студенттердің қатарында Қазақстанның барлық өңірлерінен, сондай-ақ Қытай, АҚШ, Ресей және Моңғолиядан келген білім алушылар бар.

Сапар барысында делегация Солтүстік Қазақстан облысының әкімі Ғауез Нұрмұхамбетовпен кездесті. Тараптар стратегиялық ынтымақтастық жобасын одан әрі дамыту және өңірде халықаралық деңгейдегі зерттеу университетін құру перспективаларын талқылады.

«Біз адам капиталын өңірдің тұрақты дамуының негізгі факторы ретінде қарастыра отырып, өнеркәсіпті, заманауи технологияларды, ғылым мен жоғары білімді жүйелі түрде дамытып келеміз. Бұл жұмыста М. Қозыбаев атындағы Солтүстік Қазақстан университеті мен Аризона университетінің стратегиялық әріптестігі ерекше орын алады. Қазақстан Республикасының Президенті Қасым-Жомарт Тоқаевтың бастамасымен жүзеге асырылып жатқан бұл жоба еліміздегі ең табысты халықаралық білім беру жобаларының біріне айналды. Солтүстік Қазақстан облысында халықаралық деңгейдегі зерттеу университетін құру – стратегиялық мақсатымыз», – деп атап өтті Солтүстік Қазақстан облысының әкімі Ғауез Нұрмұхамбетов.

Сапардың маңызды қорытындыларының бірі – Қазақстан Республикасы Ғылым және жоғары білім министрлігі мен Аризона университеті арасында академиялық және ғылыми ынтымақтастықты одан әрі дамытуға жаңа мүмкіндіктер ашатын өзара ынтымақтастық туралы меморандумға қол қойылуы болды.

Аризона университетінің президенті доктор Суреш Гаримелла мемлекеттік қолдау жобаның табысты жүзеге асырылуының негізгі факторларының бірі екенін атап өтті.

«Бұл – менің Қазақстанға алғашқы сапарым. Осы күндері біз Премьер-Министрмен және министрлермен бірқатар кездесулер өткіздік. Біздің жобамызға мемлекет пен Қазақстан Президенті тарапынан көрсетіліп отырған қолдауды көріп, ерекше қуандым. Біз Ғылым және жоғары білім министрлігінің серіктестікті дамыту жолында атқарып жатқан ауқымды жұмысын жоғары бағалаймыз. Әрине, жергілікті атқарушы органдар мен Солтүстік Қазақстан облысы әкімдігінің қолдауынсыз бұл жетістіктерге қол жеткізу мүмкін болмас еді. Бүгін біз алғашқы нәтижелерді көріп отырмыз – алғашқы түлектеріміз дипломдарын алады. Бірақ бұл тек бастамасы екеніне сенімдімін. Алда көптеген бірлескен жобалар мен ауқымды жоспарлар күтіп тұр», – деді Суреш Гаримелла.

Бүгінде екі университеттің ынтымақтастығы білім беру қызметінің шеңберінен әлдеқайда асып түсті. Соңғы екі жылда геномика, агротехнологиялар, су ресурстарын басқару және күкіртті полимерлеу салаларында бірлескен халықаралық ғылыми жобалар портфелі қалыптасты.

Делегация университеттің оқу-зертханалық корпусын аралау барысында жүзеге асырылып жатқан ғылыми зерттеулердің нәтижелерімен, сондай-ақ Kozybayev University ғалымдарының перспективалы ғылыми әзірлемелерімен танысты.