Өз жолыңды қалай табуға болады: университеттің кітап клубында кәсібилік пен өмірлік миссия туралы әңгіме өрбіді

Бүгін Kozybayev University-де OQYRMAN кітап клубының кезекті отырысы өтті. Клуб құрамына университеттің 70-ке жуық студенті, оқытушысы мен қызметкері кіреді. OQYRMAN - кітап оқу арқылы адамдарды біріктіретін, пікір алмасу арқылы шабыт сыйлайтын, ал қызықты тұлғалармен кездесулер арқылы көкейдегі сұрақтарға жауап табуға және болашаққа сеніммен қарауға мүмкіндік беретін орта.

Бұл жолғы кездесудің қонағы - Петропавл қаласына танымал блогер әрі іс-шара жүргізушісі Ильдар Сисанбаев болды.

Студенттер Ильдардың әңгімесін зор қызығушылықпен тыңдап, оған сұрақтар қойды және кәсіби қалыптасу жолымен танысты. Спикер шығармашылық ортада өткен балалық шағы, оның тұлға ретінде қалыптасуына әсер еткен жағдайлар және алға ұмтылуына күш беретін факторлар туралы әңгімеледі. Сонымен қатар ол жеке тәжірибесімен, кәсіби қыр-сырымен және өмірінде маңызды бағдар санайтын ұстанымдарымен бөлісті.

«Кездесудің негізгі ойы қарапайым болғанымен, маңызы зор: өз ісіңді сүй, оған бар ынтаңмен беріл және арманыңа жетуден қорықпа! Өйткені нағыз кәсібилік тек білім мен дағдыдан ғана емес, атқарып жүрген ісіңе деген шынайы қызығушылықтан да басталады. Мұндай кездесулер әрбір кәсіби жетістіктің артында өзіндік тарих, жүріп өткен жол және өз мүмкіндігіңе деген сенім бар екенін еске салады. Кейде шынайы әңгіме үлкен өзгерістердің бастамасына айналуы мүмкін», - деп атап өтті Kozybayev University ғылыми кітапханасының директоры Әсия Ермишева.

OQYRMAN кітап клубы өз жұмысын жалғастыруда. Мұнда өңірге танымал тұлғалармен кездесулер өткізіліп қана қоймай, оқылған әдеби шығармалар да талқыланады.

Клуб мүшелері бүкіл ел бойынша алты айлық кітап оқу марафоны өтіп жатқан «Кітап оқитын ұлт» жалпыұлттық жобасына да қатысады. Қазіргі уақытта аталған жобаға университеттің 1000-ға жуық студенті тіркелген.