Ұлттық кітап күні оқушыларға сыйлықтар табысталды

Петропавл қаласындағы Сафуан Шаймерденов атындағы қазақ классикалық гимназиясына Қазақстан Республикасының Ғылым және жоғары білім министрі Саясат Нұрбек пен М.Қозыбаева атындағы Солтүстік Қазақстан университетінің атынан 70-тен астам дана кітап сыйға тартылды. Шара Ұлттық кітап күні аясында ұйымдастырылды. Жаңа мереке Мемлекет басшысының тікелей тапсырмасымен елімізде 23 сәуірде алғаш рет тойланады.

«Бұл білімпаздық, ізденімпаздық, кітапқұмарлық сияқты игі қасиеттерді дәріптейтін күн. Кітап оқыған ұрпақ озық ойлы болады. Сапалы ұлт осындай құндылықтар арқылы қалыптасады»,- деді Мемлекет басшысы Ұлттық Құрылтай отырысында.

Бастаманы қолдау мақсатында университет өкілдері тарих пен көрнекті тұлғалар туралы кітаптарды тарту етті. «Біз белгілі академик Манаш Қозыбаевтың еңбектерін, сондай-ақ, жазушы-ақын Мағжан Жұмабаев туралы әдебиеттерді ұсынып отырмыз. Олар мектеп оқушыларына жаңа білім беріп, ой-өрістерін кеңейтуге, сабаққа дайындалуға көмектеседі»,- деді Қозыбаев университетінің Басқарма мүшесі Әнуарбек Қақабаев.