Университетте Құдайберген Қалиевтің 80 жылдығына арналған «Тұлға тағылымы: адал еңбек пен халыққа қызмет етудің маңызы» атты ашық дәріс өтті. Құдайберген Қалиұлы – СҚО Құрметті азаматы, Еңбек ардагері, еңбек сіңірген қайраткер. Ол қарапайым агрономнан «Азық-түлік келісім шарт корпорациясы» ҰК АҚ Солтүстік Қазақстандағы өкілдігінің директорына дейін көтерілді. Осы жылдары кеңшар директоры, СҚО әкімінің бірінші орынбасары, облыстық статистика басқармасының бастығы қызметтерін атқарды. Адал еңбегі үшін «Парасат», «Құрмет» ордендерімен марапатталған. Шара барысында Басқарма Төрағасы – Ректор Ербол Исақаев мереке иесіне университеттің «Құрметті профессоры» марапатын табыс етті. Мерейтой иесін облыстық, қалалық Ардагерлер кеңесінің өкілдері, әріптестері, жолдастары да құттықтады. Құдайберген Қалиұлы студенттермен өзінің мол тәжірибесімен бөлісіп, Отан игілігі жолында тілімізді, ұлтымызды сақтаудың маңыздылығына тоқталды: « Жиналған жастарға өзімнің өмірлік еңбек жолыммен бөлісіп, бірқатар кеңестерімді айтқым келеді. Бүгін отырыстың алдында жоғары оқу орнының Ректоры Ербол Исақаевпен тіл мәселесін талқыға салдық. Өзге ұлттың өкілі, әріптесіміз қазақ тілін көп жылдар бойы зерттеп, үйреніп жүр екен. Бұл деген үлкен мақтаныш. Қазіргі таңда басқа ұлт өкілдері қазақ тілін жетік меңгеріп, оқып жүр. Бүгінде тілімізді, дінімізді білу біздің негізгі міндетіміз деп санаймын. Маған құрмет көрсетіп, аға буын өкілдерінің өнегесін тыңдауға жиналған барша білім алушыларды мақтан тұтамын». Шара соңында қатысушылар университеттің бас ғимаратының жанындағы саябаққа университеттің құрметті профессоры Құдайберген Қалиевке арнап атаулы шырша отырғызды.

Қозыбаев университетінің студенттері академиялық ұтқырлық бағдарламалары бойынша Еуропаның жетекші университеттерінде білім алуға бірегей мүмкіндік алады. Бұл олардың көкжиектерін кеңейтуге, жаңа білім беру ортасына бейімделуге және кәсіби дағдыларын жақсартуға көмектесетін құнды тәжірибе. «Шетел филологиясы» және «Шет тілі: екі шет тілі»білім беру бағдарламалары бойынша оқитын студенттеріміз Аянат Сатыбалды, Мөлдір Сапарғали және Сәндігүл Қарабай Литваның Mykolas Romeris университетінде білім алып жатыр.  Ал Әйгерім Қасенова («Электроника және телекоммуникация»)бойынша Польшаның Lodz университетінде 1 қазаннан бастап оқып жатыр. Сонымен қатар, венгриялық Debrecen университетінде «Бизнес және менеджмент» бағдарламасын үшінші курс студенті Алтынай Исатаева меңгеруде. Шетелде оқу-бұл басқа мәдениетпен және білім беру жүйесімен танысу, сонымен қатар болашақ мамандарға өздерінің кәсіби құзыреттерін жақсартуға, халықаралық байланыстар орнатуға және жаһандық еңбек нарығында бәсекеге қабілеттілігін арттыруға мүмкіндік береді. Академиялық алмасу бағдарламасы Қозыбаев университетінің студенттеріне:* Жетекші шетелдік университеттерде оқу тәжірибесін алу* Шет тілі деңгейін арттыру* Өз саласында жаңа әдістер мен технологияларды меңгеру*Ой-өрісін кеңейту және мәдениетаралық қарым-қатынас дағдыларын дамыту мүмкіндігін береді Мұндай тәжірибе студенттеріміз үшін олардың кәсіби әрі жеке дамуы мен табысты мансап құру жолында жаңа мүмкіндіктер ашады. Студенттерімізге сәттілік тілейміз!

СҚО бойынша сот сараптамалары институтының «ҚР Әділет министрлігінің Сот сараптамалары орталығы» РМК филиалының директоры Еркебұлан Мұқанов Қозыбаев университетіне келді. Кездесуде ЖОО басшылығымен серіктестікті дамыту мәселелері талқыланып, меморандумға қол қойылды. Оның мақсаты тәжірибеге бағдарланған оқытудың заманауи нысандарын енгізу, заң кадрлары мен кәсіби мамандарды сапалы даярлауды жетілдіру, оқытудың өндіріспен байланысын нығайту және түлектерді табысты жұмысқа орналастыру болып табылады. Әріптестік шеңберінде бірлескен іс-шаралар, ғылыми зерттеулер жүргізу; ССО қызметкерлерінің оқу сабақтарын, ҒЗЖ және кафедралардың СҒЗЖ өткізуге қатысуы; бірлескен жұмыстарды жариялау, дипломдық жобаларға, диссертацияларға жетекшілік  ету және рецензиялау жоспарланған. Сондай-ақ оқытушылар мен қызметкерлердің біліктілігін арттыру көзделеді. «Біз заманауи жабдықтар орналасқан жаңа оқу-зертханалық корпустағы зертханаларды іске қостық. Сонымен қатар, жақында су мәселелерін зерттеу бойынша мегагрантты жеңіп алдық. Сол арқылы жаңа жабдықтарды сатып алу көзделген: хроматографтар, ауылшаруашылық зерттеулеріне арналған техника, судың, топырақтың, жемшөптің сапасын талдау және іргелес салаларда зерттеулер жүргізуге болады. Сондықтан біздің оқу ордамыз сапалы базамен қамтылған », – деді Басқарма Төрағасы-Ректор Ербол Исақаев. Меморандум ғылыми зерттеулер мен практикалық қызметті дамытуға негіз болады, соның нәтижесінде болашақ кадрларды даярлау деңгейін жақсартуда маңызды рөл атқарады.

Білім ордамыздың профессоры, көрнекті ғалымы, ойшыл Александр Владимирович Никифоров 75 жасқа толды. ҚР ҚҒА корреспондент-мүшесі болып, саналы ғұмырын ғылымға, білімге, қоғамның рухани мәдениетін дамытуға арнады. Мерейтой иесін өзге де ғалымдар, әріптестері, достары мен шәкірттері айтулы күнмен құттықтап, ыстық ықыластарын білдірді. ҚР ҒЖБ министрі Саясат Нұрбек, СҚО әкімі Ғауез Нұрмұхамбетов және университет басшылығы құттықтауларын жолдады. Александр Владимирович ҚР ҒЖБМ «Еңбек ардагері» медалімен және ҚХА «Алғыс» төсбелгісімен марапатталды. Салтанатты басқосуда өскелең жастар үшін өресі биік тұлға Александар Никифоровтың өмірі мен шығармашылығы кеңінен баяндалды. Жастайынан білімге деген ізденісі, оны философия әлеміне алып келді. Профессор Никифоровтың негізгі жұмысы қазіргі қоғамдағы діннің рөлі, конфессияаралық диалог мәселелері мен мәдениеттер бірлігін зерттеуге арналады. Александр Владимировичтің жүрегінде педагогика ерекше орын алды. Жарты ғасырдан астам уақыт бойы ол өз білімін студенттермен бөлісіп, оларды терең ойлауға, ізденімпаз болуға шақырады. Бүгінгі күні Александр Владимирович Никифоровтың өзі 50 жылдан астам қызмет еткен Қозыбаев университетінің дамуына қосқан үлесін бағаламау мүмкін емес. Ол университеттің интеллектуалдық және рухани өмірінің ажырамас бөлігіне айналды — дана тәлімгер, беделді педагог. Осы күні мерейтой иесіне ҚХА, ҚР ҒЖБМ философия, саясаттану және дінтану институты (Алматы қ.), Діндерді зерттеу орталығы (Астана қ.), «QAMQOR ASTANA» ҚҚ (Астана қ.),  Әл-Фараби атындағы ҚазҰУ философия және саясаттану факультетінен (Алматы қ.), СҚО ІСБ «Қоғамдық келісім», СҚО Дін істері басқармасы және облыстық Ардагерлер кеңесінен құттықтаулар жолданды. Александр Владимирович! Біз сізді, мерейтойыңызбен құттықтаймыз! Әр күн сізге қуаныш әкелсін. Даналығыңызға, қажырлы еңбегіңізге және адалдығыңызға рахмет. Айналаңыз әрқашан махаббатқа, құрметке, алғысқа толы болсын!

Қозыбаев университеті Малайзияның Путра университетімен өзара түсіністік туралы меморандумға қол қойды. Селангор штатында орналасқан Путра университеті-Малайзияның жетекші мемлекеттік университеттерінің бірі. 1931 жылы негізі қаланған университетте бүгінде 15 факультет бар және инженерлік, медициналық ғылымдар, гуманитарлық ғылымдар, экономика, менеджмент, білім беру, тілдер және коммуникациялар бойынша бағдарламалар ұсынады. Мұнда 25 000-нанастам студент, оның ішінде 50-ден астам елдерден келген халықаралық студенттер оқиды. Ол QS World University Rankings 2026 рейтингінде 134-ші орында. Путра университетінің өкілдері PhD доктор Лили Нурлияна Абдулла, Азизол Абдулла және Сухайми Пилус университетімізде бір ай болды. Олар студенттерге дәріс оқып, семинарларға қатысты, халықаралық ғылыми журналдарға бірлескен ғылыми мақалалар дайындаумен айналысты.Қонақтар ақпараттық және тарату жүйелерінің, сондай-ақ телематика инженериясының мамандары.  «Осымен университетке екінші рет келіп отырмын. Бұл жолы студенттердің білімдері мен ағылшын тілін меңгеру деңгейлері жоғары. Біз Қайнижамал Ықыласовамен бірге білім берудің икемділігі мен қолжетімділігін арттыру үшін ЖИ технологиясын пайдалана отырып, цифрлық оқыту моделін әзірлеу бойынша ірі ғылыми жобаны қолға алдық», - деді доктор Лили Абдулла.  Екіжақты меморандум екі ЖОО арасында тәжірибе алмасып, өзара әріптестікті дамытуды көздейді. «Бұл біздің ынтымақтастығымыздың жақсы бастамасы. Біздің университет қос дипломдық білім беретін бірлескен бағдарламалар құру мүмкіндігін қарастыруға дайын. Академиялық ынтымақтастықтың үлгісі ретінде: АҚШ-тың Аризона университетімен бес және Қытайдағы Солтүстік-Батыс ауыл және орман шаруашылығы университетімен екі қос дипломдық бағдарламаны жүзеге асырып жатырмыз», - деп атап өтті Ректор Ербол Исақаев. Меморандум тараптардың озық, инновациялық тәжірибелермен бөлісу, ПОҚ және студенттер үшін тағылымдамалар, бірлескен ғылыми-зерттеу және білім беру бастамаларын орнату жөніндегі ниеттерін бекітті.

Жаңа технологиялар, цифрландыру мен ЖИ әсерінен жылдам дамып жатқан еңбек нарығында сала тенденцияларын анықтау және болашақ мамандықтарды болжау, сұранысқа ие мамандарды дайындаудағы маңызды қадам болып табылады.Қозыбаев университеті алаңында  «Солтүстік Қазақстан облысындағы жаңа мамандықтар атласы» атты форсайт сессиясы өтті. Мұнда Қазақстан Республикасы Ғылым және жоғары білім министрлігінің, жергілікті атқарушы органдардың, кәсіпорындардың, колледждер мен жоғары оқу орындарының өкілдері  ашық диалог құрып, жаңа  идеялармен алмасады. Практикалық шешімдер арқылы Солтүстік Қазақстан облысына арналған болашақ мамандықтар атласы әзірленеді. Сондай-ақ, жұмыспен қамтуды жоспарлаудың негізгі құралы ретінде өңірлік жұмыс күшінің қажеттіліктері картасының рөлін күшейту.Аймақ экономикасының ерекшеліктерін және ірі кәсіпорындардың қажеттіліктерін ескере отырып, бұл тәсіл жаңа оқу бағдарламаларына енгізілуі және түзетілуі тиіс болашақ кәсіптерге, дағдылар мен құзыреттерге қойылатын талаптарды әзірлеудің маңызды тетіктерін анықтауға мүмкіндік береді.  Қозыбаев университеті «Мамандығым-Болашағым» бағдарламасының орталығына айналып, осы жерде аймақтық кеңсе ашылды. Мемлекет басшысының тапсырмасымен 2019 жылдан бастап Қазақстан Республикасы ҒЖБМ жүзеге асырып жатқан бұл бағдарлама жаңа кәсіптер мен құзыреттердің салалық атластарын әзірлеуден басталды. Ғылым және жоғары білім министрі Саясат Нұрбек қатысушыларға арнаған бейнеүндеуде аймақ экономикасының даму тенденцияларын талдап, қажетті мамандарды анықтау маңыздылығын атап өтті:– Білім беру мекемелері бұл сұранысқа дер кезінде жауап беріп, жұртшылық Rapid Foresight немесе Skills Technology Foresight әдістемесі арқылы оқытылатын дамудың, білім берудің келешегі зор бағыттары, жаңа мамандықтар туралы түсінік алады. Осы әдістемені пайдалана отырып, қазірдің өзінде жаңа кәсіптердің тоғыз салалық атластары және кадрлық қажеттіліктер картасы деп аталатын бес аймақтық атлас әзірленді. Біз үшін өңірлік университеттерді өңір экономикасы үшін мамандар дайындайтын хаб ретінде орналастыру өте маңызды,- деді министр. Солтүстік Қазақстан облысы үшін атласты дамыту үшін бұрын үш негізгі бағыт белгіленген: ауыл шаруашылығы, құрылыс, өнеркәсіп және машина жасау. Қозыбаев университеті қазірдің өзінде 28 инновациялық білім беру бағдарламасын ұсынып отыр (оның 12-сі 2025 жылы ашылады), дуальды оқыту енгізіліп, өнеркәсіптік PhD докторантура бағдарламасы іске қосылды. «Біздің мақсатымыз – осы талдаулар мен пікір алмасудың нәтижесінде болашақта сұранысқа ие және заманауи кәсіпорындарда жұмыс істей алатын түлектерді даярлау. Сонымен қатар, университетте нақты мамандықтар мен білім беру бағдарламаларын іске қосуды қамтамасыз ету»,- деп атап өтті Қозыбаев университетінің Басқарма Төрағасы-Ректор Ербол Исақаев. Қатысушылар атап өткендей, жаңа кәсіптер, құзыреттер мен дағдыларды игеру үшін облыс экономикасының қажеттіліктерін дәл болжау және жан-жақты зерделеу бүгінгі күннің басты міндеттердің бірі. «СҚО жаңа мамандықтар атласы» атты форсайт сессиясының қорытындысы бойынша 23 білім беру бағдарламасын жүзеге асыру бойынша ұсыныстар әзірленді. Біздің өңіріміздегі сұранысқа ие мамандықтарға: жасыл құрылыс инженері, киберқауіпсіздік  жөніндегі маманы, ҰҰА маманы, өндірістегі химиялық заттарды бақылау жөніндегі маман, ЖИ инженері және т.б. кіреді.

Петропавлда көшелерді абаттандыру мен көгалдандыруға бағытталған «Таза Қазақстан» ауқымды экологиялық акциясы өтті. Бастамаға Қозыбаев университетінің ұжымы да қосылды. Іс-шараға ЖОО-ның 300-ге жуық қызметкерлері мен студенттері қатысты. Қатысушылар студенттік қалашықта тазалық жұмыстарын жүргізіп, нәтижесінде 1 тоннаға жуық қоқыс жиналды. Сондай-ақ, акция аясында М. Жұмабаев атындағы саябақта Солтүстік Қазақстан облысы әкімінің қатысуымен 100 ағаш отырғызылды. Мұндай іс-шаралар экологиялық мәдениетті қалыптастыруға ықпал етіп, жастардың жауапкершілігін арттырады. Қозыбаев университеті дәстүрлі түрде қоршаған ортаны сақтауға және жастар арасында экологиялық сананы дамытуға бағытталған бастамаларды қолдайды.

Осы жолы SKO Hub мамандары Қозыбаев университетінде қос дипломдық бағдарлама бойынша оқитын студенттерге AI-воркшоп шарасын өткізді. Қатысушылар IT  заманауи технологиялардың қалай қолданылатынын білді, генеративті ЖИ құралдарымен танысты. SKO Hub облысымызда стартап жобалар мен білім беру бағдарламаларын әзірлеп, жасанды интеллект енгізумен айналысады. Олар білім алушыларды хаб қызметімен таныстырып, бағдарламалар мен стартап жобаларға қатысуға шақырды. Сондай-ақ, нейрожелілерді күнделікті және шығармашылық тапсырмаларда қалай қолдануға болатынын көрсетті. SKO Hub мамандарының айтуынша, апта сайын  IT, дизайн және стартап жобалары бойынша пайдалы тренингтер өткізіледі. «Біз Astana Hub филиалымыз. SKO Hub «Qyzyljar» креатив орталығында орналасқан. IT саласы мен басқа да салалар бойынша білім алатын студенттер бізге келіп, өз шеберліктерін шыңдап, іс-шаралар мен түрлі үйірмелерге қатыса алады.Немесе өз клубтарын да құра алады»,- деді СҚО IT-хаб өңірлік директоры Нұргүл Булатова Кездесу соңы зияткерлік ойынымен аяқталды. Мұнда студенттер өздерінің ЖИ озық дағдыларын көрсетіп, SKO Hub брендтік сыйлықтарына ие болды.

Біз Ресейдің оқу орындарымен ынтымақтастықты дамытудамыз. Университетімізге Қорған облысының делегациясы келді. Олардың құрамында, білім және ғылым департаментінің өкілдері, Қорған мемлекеттік университетінің ректоры, колледждер мен техникумдардың директорлары болды. Қонақтар жаңа оқу зертханалық корпустың агротехнология және медицина саласындағы заманауи зертханаларын, бейне жазба студиясы мен Қытайдың Солтүстік-Батыс ауыл және орман шаруашылығы университетінің қытайлық серіктестерімен бірлесіп ашылған зертханаларын аралады. Басқарма Төрағасы – Ректор Ербол Исақаев университеттің қызметі, білім беру бағдарламалары, ғылыми зерттеулері, Аризона университетімен ауқымды ынтымақтастық жобасы, халықаралық серіктестіктер туралы бөлісті. Сондай-ақ, Қозыбаев университетіне жергілікті билік тарапынан жоғары қолдау көрсетіліп жатқанын атап өтті. СҚО әкімінің орынбасары Жүсіп Жұмағұлов университеттің аймақтық жобаларды ғылыми қолдауына және «Жаңа кәсіптер атласы» аясындағы білім беру бағдарламаларына ерекше тоқталды.Қорған қаласының білім және ғылыми ұйымдарымен ынтымақтастықтың әлеуетті бағыттары анықталды:- студенттер мен оқытушылардың сапарлары мен алмасуы, тағылымдамадан өту;- бірлескен ҒЗТКЖ;- зертханалар, ғылыми-зерттеу және инженерлік орталықтар құру;- технологиялар трансферті және коммерцияландыру;- білім, ғылым және инновация салаларындағы стратегиялық серіктестікті дамыту. Қонақтар алдағы уақытта да ынтымақтастыққа дайын екендіктерін білдірді. «Сіздердің ЖОО-ның үлкен артықшылығы – ауылшаруашылық тауар өндірушілерімен, медициналық ұйымдармен ынтымақтастық орнатуы болып табылады. Облыстың дамуы үшін ауқымды жұмыс атқарасыздар. Алдағы уақытта, достық қарым-қатынас орнатуға үміттенеміз. Университет басшылығымен , екі тарапты да қатты қызықтыратын білім беру туризмі тұжырымдамасын талқыладық.Сондықтан мұндай сапарлар студенттерді, колледж оқытушыларын және мектеп оқушыларын қызықтырады. Бұл алмасу бізге өз саламыздың кәсіби мамандарын дамытуға мүмкіндік береді»,-деп бөлісті Қорған облысының білім және ғылым департаментінің директоры Андрей Кочеров

ЖОО- да жастар арасында қаржылық сауаттылықты арттыру және «Fin IQ»республикалық қаржы диктантына дайындық бойынша ауқымды жұмыс жүргізілді. Оның шеңберінде Солтүстік Қазақстан облысы бойынша Экономикалық тергеу департаментінің өкілдері студенттермен кездесу өткізді.ҰББ жетекшісі Виктория Алпеева студенттерге алаяқтықтың негізгі схемалары, қаржы пирамидалары туралы егжей-тегжейлі айтып берді, сондай-ақ, цифрлық технологиялар мен қаржы әлемінде болып жатқан процестерді түсінуге көмектесетін құнды кеңестермен бөлісті. Жалпы республикалық диктанттың мақсаттары мен міндеттері талқыланды. 500-ге жуық студент іс-шараға жоғары қызығушылық танытып, талқылауға белсенді қатысты.