Бүгін Қазақстанда мемлекеттік гранттар байқауына қатысу үшін үміткерлерден өтініштер қабылдау басталды. Еліміз бойынша барлығы 79 мыңнан астам грант бөлінген. Оның 60%-ы инженерлік және ауылшаруашылық кадрларын даярлауға, 21%-ы педагогикалық бағыттар, 19%-ы қызмет көрсету, бизнес, гуманитарлық және жаратылыстану ғылымдары сияқты салаларға бағытталған.
Биыл М.Қозыбаев атындағы Солтүстік Қазақстан университетінің қабылдау комиссиясы жаңа оқу-зертханалық ғимаратта жұмыс істейді. Талапкерлерді ректор,басқарма мүшелері, декандар, қабылдау комиссиясының қызметкерлері, сонымен қатар студенттер мерекелік көңіл-күймен қарсы алды. Бірінші келген талапкерлер мен олардың ата-аналарына естелік сыйлықтар табыс етілді. Құжат тапсырушы балаларға ыңғайлы болу үшін барынша қолайлы жағдайлар жасалған: электронды кезек жұмыс істейді, демалыс орындары ұйымдастырылған, әр факультеттен кеңес берушілер бағыт-бағдар беріп, қолдау көрсетеді.
Төртінші жыл бойы біз Аризона университетімен стратегиялық серіктестік орнатамыз. Биыл бірлескен бағдарламаларға 400-ге жуық грант бөлінді. Университетте барлығы 1000-ға жуық бюджеттік орын болса, оның 150-ден астамы «Серпін» бағдарламасы бойынша білім алатын талапкерлерге арналған. Педагогикалық квота – 180. Грант конкурсына құжаттарды 20 шілдеге дейін тапсыра аласыздар.
БІЗ СІЗДЕРДІ күн сайын түскі үзіліссіз Петропавл қ., А.Пушкин к-сі, 86Б мекенжайы бойынша КҮТЕМІЗ!
