Профессор Гоктюрк Джебеджиоглумен түрік тілін меңгереміз

Жыл сайын Қозыбаев университетінде халықаралық ынтымақтастықты және тілдік бағыттарды дамытуға көңіл бөлінеді. Университет шетелдік серіктестермен академиялық байланыстарды белсенді түрде нығайтып, мәдениеттердің өзара  тәжірибе алмасуына жағдай жасайды.

Осындай ынтымақтастықтың  бірі «Герман-роман филология» кафедрасындағы түрік тілін меңгеру сабақтары болып табылады. 2025 жылдың қазан айынан бастап ЖОО-ға Түркияның Қазақстан Республикасындағы Елшілігінің қолдауымен жүзеге асырылып жатқан бағдарлама аясында Түркиядан келген профессор – Гоктюрк Джебеджиоглу  жұмыс істейді. Бұл бағдарлама тілдік білім беруді дамыту, мәдени байланыстарды нығайту және елдер арасындағы академиялық ынтымақтастықты кеңейту мақсатында түрік оқытушыларын шетелдік университеттерге тартуды көздейді. Профессор өз жұмысын келесі жылы біздің  білім ордамызда жалғастырады.

Гоктюрк Джебеджиоглу алғашқы сабақтарынан бастап студенттермен жұмыс жасауда ерекше тәсілдерді қолданады. Ол тілді практикалық қолдануға баса назар аударады, студенттердің сөйлеу дағдыларын дамытады, сонымен қатар тілдік ортада өздерін сенімді сезінуге көмектеседі.

Профессор студенттерді Түркияның  дәстүрлерімен, өмір салты және мәдени мұрасымен таныстыруға ерекше назар аударады. Осының арқасында білім алушылардың тілге деген қызығушылықтары үнемі артып келеді.

Кафедра оқытушылары мен студенттері Сивас қаласының дәстүрлі «Çubukçuluk Sanatı» санатымен, профессордың туған өлкесінің бай мәдени мұрасымен жақынырақ танысуға мүмкіндік алды.

Сондай-ақ, профессор оқушылармен кәсіби бағдар беру кездесулеріне және университетте өткен Ашық есік күндеріне қатысты.  Арнайы ұйымдастырылған стендте елдің тілі, мәдениеті мен дәстүрлері туралы материалдар ұсынылды.

Осылайша, «Герман-роман филология» кафедрасындағы Гоктюрк Джебеджиоглудың қызметі түрік тілін үйренумен қатар, Қазақстан мен Түркия арасындағы мәдени байланысты дамытуға мүмкіндік береді