Kozybayev University Солтүстік Қазақстан экономикасы үшін студенттердің цифрлық құзыреттерін дамытуда

16 қазанда Астана қаласында Kozybayev University ректоры Ербол Исакаев университеттің тәжірибесін «Білім берудегі 1С экожүйесі: болашақ мамандардың кәсіби құзыреттерін қалыптастыру» атты XVI ғылыми-практикалық конференцияда таныстырды.

Баяндаманың негізгі тақырыбы – экономикалық мамандықтар бойынша білім алатын студенттерді цифрлық бизнес ортасында жұмыс істеуге даярлау және жұмыс берушілер сұранысына ие практикалық дағдыларын дамыту.

Университетте 1С бағдарламалық өнімдерімен жұмыс істеуді үйрету болашақ экономистерді, есеп және аудит мамандарын даярлаудың маңызды бөлігі болып табылады. Осы мақсатта Сертификатталған оқыту орталығы (СОO) жұмыс істейді. Мұнда студенттер есеп жүргізуді автоматтандыру құралдарын меңгеріп, құжаттармен жұмыс істеуді, деректерді талдауды, қателерді анықтауды және электрондық есептілікті қалыптастыруды үйренеді.

Орталық жұмыс істеген уақыт ішінде 250 адам білім алды, олардың 200-ден астамы «1С:Кәсіби маман» сертификатын иеленді. Оқыту үдерісіне өздері де сертификаттаудан өткен мамандар тартылған: төрт оқытушы біліктілік емтихандарын тапсырса, олардың үшеуі қосымша СОO оқытушысы біліктілігін алды.

Практикалық даярлық студенттерге өз білімдерін растауға және кәсіби конкурстарда өздерін көрсетуге мүмкіндік береді. 2022 жылы Динара Исмагулова үшінші орын алып, 170 мың теңге көлемінде сыйақы иеленді. 2023 жылы Дана Тілеубаева жеңімпаз атанып, бірінші орын мен 600 мың теңге көлеміндегі сыйақыны жеңіп алды. Екі студент те «1С:Маман-кеңесші» біліктілігін алды.

Бұл бағытты дамытуда бизнеспен ынтымақтастық маңызды рөл атқарады. Петропавл қаласындағы 1С компаниясының өкілі болып табылатын «ФИРМА ГЕМ СК» ЖШС базасында «Экономика, есеп және қаржы» кафедрасының филиалы жұмыс істейді. Сонымен қатар университет 1С бағдарламалық қамтамасыз етуін жеңілдетілген шарттармен алды, ал 2026 жылы 1С компаниясы Орталыққа 15 жаңа компьютер табыстады.

Бұл жұмыстың басты нәтижесі – жоғары оқу орнындағы білім беруді бизнестің нақты міндеттерімен ұштастыру. Студенттер теориялық біліммен қатар кәсіби цифрлық құралдармен жұмыс істеудің практикалық тәжірибесін де меңгереді. Бұл олардың кәсіби ортаға сенімді қадам басуына, ал өңір кәсіпорындарының заманауи құзыреттерге ие мамандармен қамтамасыз етілуіне мүмкіндік береді.

Университет экономикалық білім беру бағдарламалары бойынша білім алатын студенттерге арналған оқытуды кеңейтуді, бағдарламалық қамтамасыз ету мен заңнамадағы өзгерістерді ескере отырып, курстардың мазмұнын жаңартуды, практикалық тапсырмаларды әзірлеу мен құзыреттерді бағалау үдерісіне жұмыс берушілерді белсенді тартуды, сондай-ақ оқытушылар мен студенттердің кәсіби сертификаттауын дамытуды жоспарлап отыр.

Kozybayev University Солтүстік Қазақстан облысының экономикасы үшін білікті кадрлар даярлауға қосқан үлесі, білім беру бастамаларын қолдауы және серіктестігі үшін 1С компаниясы мен «ФИРМА ГЕМ СК» ЖШС-не алғыс білдіреді.