«Жас ғалым» – 2027: ғылыми жобаларға өтінім қабылдау басталды

Қазақстан Республикасы Ғылым және жоғары білім министрлігінің Ғылым комитеті 2027 жылға арналған «Жас ғалым» жобасы бойынша жас ғалымдардың ғылыми зерттеулерін гранттық қаржыландыру конкурсына өтінім қабылдау басталғанын хабарлады.

Конкурстың мақсаты – жас зерттеушілердің ғылыми әлеуетін дамыту, талантты жастарды ғылымға тарту және жоғары білікті ғылыми кадрларды қалыптастыру.

Конкурстың негізгі шарттары:

• Жобаларды іске асыру мерзімі – 36 ай.

• Жалпы қаржыландыру көлемі – 3 млрд теңге.

• Бір жобаны қаржыландыру көлемі – 30 млн теңгеге дейін (жылына 10 млн теңгеден аспайды).

Конкурс келесі бес басым бағыт бойынша өткізіледі:

1. Климаттық орнықтылық, су қауіпсіздігі, табиғи ресурстар және АӨК-нің тұрақты дамуы.

2. Технологиялық егемендік және өнеркәсіптік бәсекеге қабілеттілік.

3. Денсаулық, адами даму және өмір сүру сапасы.

4. Ұлттық қауіпсіздік, қорғаныс және маңызды инфрақұрылымның орнықтылығы.

5. Іргелі зерттеулер, ғылыми қор және ғылыми әлеует.

Конкурсқа өтінім беру сәтінде жасы 44-тен аспаған, Қазақстан Республикасының азаматтығы бар, ғылыми жарияланымдарға қатысты белгіленген талаптарға сәйкес келетін, PhD немесе тиісті ғылыми дәрежесі бар, сондай-ақ докторантура бағдарламасын толық аяқтаған жас зерттеушілер қатыса алады. Қатысу үшін конкурстық құжаттаманың барлық талаптары орындалуы тиіс.

Өтінімдерді қабылдау мерзімі: 2026 жылғы 12 қазаннан 10 қарашаға дейін (қоса алғанда).

Өтінімдер «Ұлттық мемлекеттік ғылыми-техникалық сараптама орталығы» АҚ ақпараттық жүйесі арқылы электронды түрде қабылданады: https://is.ncste.kz.

Қосымша ақпарат пен конкурстық құжаттама: https://www.gov.kz/org/science/press/news/details/1309847?lang=kk

М. Қозыбаев атындағы Солтүстік Қазақстан университеті жас ғалымдарды конкурсқа қатысуға шақырады!